Hand vol pille . . .

Eendag lank lank gelede was daar twee tannies, hulle het in 'n vreemde stad vêr van hier gewoon.

Die tannies was nuut in die omgewing en het gehoor as jy die taxi (bussie) voor die hotel vat dan gaan hy outomaties na die winkel snentrum toe. So die bussie ry elke 20 min 'n trippie in die rondte, mall toe en hotel toe. Hoe wonderlik! So jy kan lekker shop en later net weer inklim en terug ry.

So op 'n lekker dag besluit die tannies dis nou sulke tyd en klim in die bussie voor die hotel, daar is 'n ry van mense en almal wil in en almal kom in, en die bussie is vol mense, en daar gaat hulle. Die een tannie kom agter hulle ry in die verkeerde rigting. . .

Nou is hulle in en hulle sit styf en die bussie ry . . .

Na 'n ruk kom hulle by iets wat soos 'n hospitaal lyk aan . . .

Baie verbaas en verward kom die tannies agter hulle het in die ambulans bussie geklim en nie die hotel bussie nie. Die kliniek is langs die hotel en die bussie het nie sy gewone stopplek gekry nie toe stop hy voor die hotel en omdat daar maar altyd mense is wie van die kliniek na die hospitaal gestuur word was daar 'n tou mense en almal het blindelings gedruk en geskuur om in te kom op die trippie hospitaal toe.

Tannies, al geselsende, het nie eens gekyk hoe die bussie van buite lyk nie en net geklim!

Genadiglik het die hospitaal bussie ook gereeld sy rondtes gemaak, maar voor die tannies terug was by die hotel moes hulle by die hospitaal uitklim en is in die ry gedwing om saam met die siekes te gaan sit sodat hulle ondersoek kan word, niemand wou glo hulle het perongeluk ingeklim nie, veral as jy in 'n vreemde plek met vreemde taal is en niemand mekaar so lekker verstaan nie, en as die kliniek jou stuur is daar iets verkeerd met jou en MOET die dokter jou sien. Jy ry nie sommer verniet in die ambulans rond nie, jy moet behandeling ontvang en die wie nie ernstig is nie word in die namiddag weer teruggeneem na die kliniek toe om die behandling daar te rapporteer.

So stry en baklei kon jou in die 'Psychiatric' afdeling laat beland . . . die het hulle darm gou besef toe die nurse mekaar begin konsulteer en die een woord bekend geklink het, en elkeen het toe maar 'n siekte geveins. Hulle is toe ondersoek en genadiglik nie siek genoeg gevind om opgeneem te word nie.

Laat die middag is die twee tannies weer voor die hotel afgelaai, elkeen met 'n hand vol pille, dood van die honger en dors, daar was niks wat hulle êrens te ete of te drinke kon kry wat veilig gelyk het nie, en moes maar onder die bome saam met die ander wag om weer opgelaai te word. Om van shopping en lekker lunch by die mall, nie eens te praat nie.

Die storie is eers baie later oorvertel want dit was ietwat 'n verleentheid . . .

Die een tannie vertel dat die siekte wat sy geveins het, tref haar toe so 'n week later, maar gelukkig het sy toe pille gehad ;-)

Murphy, dis wat ek sê, en kyk waarin jy klim as jy klim, hiehiehie, dit geld sommer vir baie dinge in die lewe ook! Blindelings die stroom volg kan 'psychiatric'e gevolge hê!!

Jy gaan nie altyd later 'n hand vol verniet pille hê om als beter te maak nie . . .

Nou of dit 'n ware verhaal is en of dit gorrel is moet julle maar self besluit, ek sien net die les raak.

Lekker pillelose daggie vir almal.

Mwah

Iretha